Kesekî Afganî li Lizbonê êrîsî navenda Sîeyên Îsmaîlî kir: 2 kustî...

PeyamaKurd – Hat ragihandin ku li bajarê Lîzbonê yê Portekîzê kesekî êrîşî ser navendeke Îslamî ya Şîeyên mezhebê Îsmaîlî kir û di encamê de du kes hatin kuştin û hejmarek kes jî birîndar bûn.

Li gorî ragihandina Polîsê Lîzbonê, êrîş 28ê Adarê roja Sêşemê bi kêran hatiye kirin û di encamê de du kes hatine kuştin û çend kes jî birîndar bûne û êrîşkarê ku bi xwe Afganî bûye bi birîndarî hatiye desteserkirin.

Medya herêmî ya Portekîzê ragihandiye ku êrîşkarê Afganî êrîş biriye ser navenda baskê Şîeyan ê Îsmaîlî li Lîzbonê ku du kes bi kêran hatine kuştin û êrîşkar jî bi lêdana guleyê ve ji aliyê polîsan hatiye desteserkirin.

Serokwezîrê Portekîzê Antonio Costa, êrîş wekî bûyereke munferît nirxand û got, hîn zû ye derbarê vê tawanê de şîroveyekê bikin.

Terîqeta Îsmaîlî baskekî Îslamiyên Şîe ye ku beriya niha jî rastî êrîşên hin komên Îslamî yên tundrew ên Pakistanî hatibûn.