Komisyona Hilbijartinan ceza da 9 namzedên aliyên Kurdistanî

PeyamaKurd – Komisyona Hilbijartinan a Serbixwe ya Hilbijartinên Iraqê, 9 namzedên aliyên Kurdistanî bi sedema “binpêkirina rênimayên bangeşeyê” ceza kir.

Komisyona Bilind a Serbixwe ya Hilbijartinên Iraqê ragihand, heya niha 61 berbijêrên aliyên siyasî serbixwe ji ber binpêkirina rênimayên bangeşeya hilbijartinan hatine cezakir, 9 ji wan namzedên aliyên Kurdistanî ne.

Li gor nivîseke fermî ya Komisyona Hilbijartinan, ew namzed bi milyonek dînar hatine cezakirin, ku 4 ji wan yên Partiya Demokrata Kurdistanê (PDK), 3 berbijêrên Hevpeymaniya Kurdistan, 1 berbijêrê Komeleya Dadgerî, 1 berbijêrê Sosyalîst Demokrata Kurdistan, li gel 11 berbijêrên serbixwe û 41 berbijêrên din yên aliyên siyasî yên Iraqî.

Herwiha aliyên herî diyar ku namzedên wan hatine cezakirin, Kutleya Sedir ya ser bi Rewta Sedir, Hevpeymaniya Fetih, Hevpeymaniya Dewleta Yasa, Babilyûn, Teqedum û Ezim in.

Komisyona Bilind ya Hilbijartinan heya niha ji ber serpêçiyan, 6 berbijêr ji hilbijartinan dûr xistine.