Konsulê Holandayê: Sirketên me amade ne li Herêma Kurdistanê veberhênanê bikin

PeyamaKurd – Holanda amadekariya berfirehkirina veberhênanên xwe yên li Herêma Kurdistanê dike. Di merasîmekê de ku ji bo danasîna projeyên şirketên Holandî hatibû lidarxistin, tekezî li ser pêşxistina sektora çandinî û ewlehiya xwarinê hat kirin.

Konsulê Giştî yê Holandayê li Herêma Kurdistanê Adrian Eiselstein, diyar kir ku welatê wî dixwaze têkiliyên aborî yên bi Herêma Kurdistanê û Iraqê re kûrtir bike. Eiselstein got:

"Şirketên me amade ne ku ezmûna xwe ya serkeftî bînin vê derê. Em dixwazin bi taybetî di warên çandinî, rêveberiya av û kanalîzasyonê, enerjiya paqij, şîr û xwedîkirina ajalan de veberhênanê bikin."

Konsul destnîşan kir ku ev hewldan bi stûnên sereke yên siyaseta Hikûmeta Herêma Kurdistanê re hevaheng in, ku armanca wan zêdekirina hilberîna navxweyî û afirandina derfetên kar e.

Berpirsê Peywendiyên Derve yê Hikûmeta Herêma Kurdistanê Sefîn Dizeyî jî piştgiriya hikûmetê ji bo van projeyan anî ziman û got: 

"Em pêşwaziya her pêngaveke ku aboriya me pêş dixe dikin. Hatina şirketên Holandî tê wateya veguhestina teknolojî û zanîna nûjen bo Kurdistanê."

Tê zanîn ku Holanda di cîhanê de yek ji welatên herî pêşketî ye di warê teknolojiyên çandiniyê de, û Hikûmeta Herêma Kurdistanê di salên dawî de hewl dide ji vê ezmûnê sûd werbigire da ku aboriya xwe ji girêdayîbûna bi petrolê rizgar bike.