Wezîrê Berevaniyê yê Holandayê: Herêma Kurdistanê hevkara me ya sereke ye di serê li dijî terorê de

PeyamaKurd – Li gorî daxuyaniya Serokatiya Herêma Kurdistanê, Nêçîrvan Barzanî îro li Hewlêra paytext, pêşwaziya Wezîrê Berevaniyê yê Holendayê, Ruben Brekelmans û şanda pê re kir.

Di hevdîtinê de ku bi amadebûna Şêx Cafer Şêx Mistefa Cîgirê Serokê Herêma Kurdistanê û Wezîrê Pêşmerge Şoreş Îsmaîl tê de beşdar bûn, peywendiyên Holendayê yên li gel Iraq û Herêma Kurdistanê bi taybetî yên di warê berevaniyê û perwerdeya leşkerî de hatin gotûbêjkirin.

Her du aliyan tekezî li ser berdewamiya hemahengiya di navbera hêzên Pêşmerge, artêşa Iraqê û hêzên Holendayê de kirin.

Di hevdîtinê de rewşa siyasî û ewlehî ya Iraq û herêmê û rola Herêma Kurdistanê ya di bihêzkirina aramiyê de hate gotûbêjkirin û behsa hewlên çaksaziya Wezareta Pêşmerge û yekxistina hêzên Pêşmerge hat kirin.

Nêçîrvan Barzanî spasiya Holandayê kir ji bo piştevaniya berdewam a Hêzên Pêşmerge di şerê DAIŞê de û rola hêzên Holendayê di bihêzkirina şiyanên Pêşmerge de bilind nirxand.

Wezîrê Berevaniya Holendayê Brekelmans jî tekezî li ser rijdbûna welatê xwe ya ji bo piştevanîkirina asayîş û aramiya Herêma Kurdistanê û Iraqê kir û ragihand ku Herêma Kurdistanê hevkara me ya sereke ye di şerê li dijî terorê û peydakirina ewlehiya li navçeyê.

Her du alî li ser giringiya hevkariyê, rewşa êzidiyan û vegera wan a bo malên xwe hemfikir bûn. Her wiha di hevdîtinê de li ser pêşhatên dawî yên li herêmê bi taybetî guherînên li Sûriyê û encamên wan û gelek mijarên din minaqeşe hatin kirin.