NATOyê bertek nîsanî Tirkiyê da: Em ji encaman bi fikar in...

PeyamaKurd – Rayedarekî NATOyê ji ajansa AFPê re ragihand ku li mijara kirîna S-400ên rûsî ji aliyê Tirkiyê ve fikarên wan hene.

Rayedarê NATOyê got, “Em ji encamên çaverêkirî yên piştî kirîna S-400an ji aliyê Tirkiyê ve, bi fikar in.”

Beşek ji pergalên parastina hewayî yên Rûsî S-400an îro bi rêya du balafirên rûsî gihîştin Tirkiyê û bûn sedema karvedeneke zêde li medya cîhanê.

Piştî Çîn û Belarûsê Tirkiye dibe welatê sêyem ku wan pergalên moşekî yên Rûsyayê bikar bîne.

Jêderên rêveberiya Amerîkayê dubare destnîşan dikin ku dê Tirkiye bi kirîna S-400an re bedelekî bide û dema wan li Tirkiyê bicih bike, dê di çarçoveya yasaya CAATSAyê de dorpêç li ser Tirkiyê bên sepandin ku ji ber biryara Kongreya Amerîkî rêveberiya Trump jî nikare ji sepandina wan dorpêçan bireve.