Nêçîrvan Barzanî seroktiya civîna hêzên Pêsmerge û Hevpeymaniyê kir

PeyamaKurd - Serokê Herêma Kurdistanê Nêçîrvan Barzanî, seroktiya civîna di navbera şandeke bilind a Hêzên Hevpeymaniya Navdewletî ya li dijî DAIŞê û Wezareta Pêşmerge û saziyên ewlekarîya Herêma Kurdistanê kir.

Serokatiya Herêma Kurdistanê ragihand, di civînê de Fermandarê Giştî yê Hêzên Hevpeymanan li Iraq û Sûriyê Matthew McFarlane û Konsulê Giştî yê Amerîkayê yê li Hewlêrê Irvin Hicks jî di civînê de amadehî kirin.

Di civînê de qala çaksaziya hêzên pêşmerge û proseya çaksaziyê hate kirin û qonaxên bicihkirina plana ku di çarçoveya rêkeftina di navbera Wezareta Pêşmerge û Wezareta Berevaniya Amerîkayê de hatiye danîn, hatin nirxandin.

Herwiha behsa astengî û aloziyên proseya yekxistina hêzên Pêşmerge û rêkxistina nû ya wan di çarçoveya Wezareta Pêşmerge de hat kirin.

Serokê Herêma Kurdistanê Nêçîrvan Barzanî di civînê de got, ew piştevaniya berdewam a hevpeymanan di her warî de ji bo Pêşmerge bilind dinirxînin û da zanîn, divê gavên ji bo rakirina astengiyên li pêşiya proseya yekgirtina Pêşmerge bên bilezkirin û di vê derbarê de ew ji bo her cure alîkarî û piştgîriyê amade ne.

Fermandarê Giştî yê Hêzên Hevpeymanan li Iraq û Sûriyê Matthew McFarlane jî eşkere kir ku ew di warên curbicur de piştgîrî û alîkariya Pêşmerge berdewam dikin.

McFarlane got ku ji bo Herêma Kurdistanê bibe xwediyê hêzeke niştimanî ya yekgirtî, gavên ji bo birêxistinkirina hêzên Pêşmerge di nava Wezareta Pêşmerge de avêtine.