Pervîn Buldan: Bêyî HDPê, li Tirkiyeyê siyaset ne pêkan e

PeyamaKurd- Hevseroka Giştî ya Partiya Demokratîk a Gelan (HDP) Pervîn Buldan, li sert hilbijartinên ku dê sala bê li Tirkiye û bajarên bakur were kirin, peyamên siyasî arasteyî siyasetmedarên Tirkiyeyê kir. Buldan got ku siyaseta bêyî HDPê ne pêkan e û rola HDPê jî di vê hilbijartinê de girîng e.

Pervîn Buldan, di kongreya rêxistina HDPê ya Denizliyê ya ku îro hat lidarxistin de axivî û diyar kir ku rola partiya wan a di hilbijartinên Serokomariyê de girîng e û li ser vê girîngiyê bal kişand ser rola HDPê ya di siyaseta Tirkiyeyê de û got,

 “Ev rastiyek e ku êdî em ketine proseya hilbijartinan. Ev hilbijartin dê qedera Tirkiyeyê biguherîne. Hem hilbijartina Serokomariyê hem jî ya parlamentoyê. Di herdu hilbijartinan de jî rol û hebûna HDPê gelek girîng e. Dibe niha kes nexwaze ligel HDPê bê dîtin lê em dizanin ku dê demek were,  ew ê li deriyê me bidin.

Me deriyê xwe ji tu kesî re negirtiye. Bi taybetî jî ji bo hilbijartina Serokomariyê. Em amade ne ligel berbijêrekî ku rêgez û hebûna HDPê qebûl bike û van li ber çavan bigire, bi rêya diyalogê mijarê gotûbêj bikin. Lê heger ev neyê kirin, HDP dê bi berbijêrê xwe beşdarî hilbijartinan bibe.”