Peyama Serok Barzanî bo 75emîn salvegera damezrandina PDKê

16 August 2021 12:35 0 dîtin

PeyamaKurd – Serok Barzanî ji bo 75emîn salvegera damezrandina Partiya Demokrat a Kurdistanê (PDK) peyamek belav kir û diyar kir: “Xebata Partî fakterê girîng û bi bandor li dîroka xebat û berxwedana gelê Kurdistanê de pire li evraz û nişêvî û Partî beşdareke serekî li serkeftin û destkeftan bûye û li qonaxên dijwar de, her dem xwe bi berpirs zaniye.”

Peyama Serok Barzanî ya di 75emîn salvegera damezrandina Partiya Demokrat a Kurdistanê (PDK) de wiha ye:

Bi navê Xwedayê mezin û dilovan

Bi helkefta heftê û pêncemîn salvegera damezrandina Partiya Demokrata Kurdistanê de, germtirîn pîrozbahiyên xwe pêşkêşî hemû kadîr û endam û alîgirên Partî dikim. Pîrozbahiyê li malbatên serbilindên şehîdan û Pêşmergeyên qehreman û hemû çîn û pêkhatên Kurdistanê dikim û hêviya serbilindî û xweşiyê ji bo wan dixwazim.

Damezrandina Partî di şanzdehê Tebaxa 1946 de, pêwîstiyeke dîrokî bû ji bo berdewamiya xebat û berxwedana gelê Kurd ya li wê demên ku neyar û dagîrkerên Kurdistanê bi hemû hêz û şiyanên xwe ve hewla nehiştina şoreş û serhildana gelê Kurd didan. Partî her di destpêka damezrandinê ve heta niha amrazek bûye ji bo pêkanîna armanca demokratî û niştîmanî û neteweyiyên gelê Kurdistanê û di heman demê de jî mil bi milê li gel hêzên têkoşer û niştimanperwerên din ê Kurdistanê amrazên bergirîkirinê bûye di maf û nasnameya gelê Kurdistanê ya di hemû qonaxan de.

Xebata Partî fakterê girîng û bi bandor di dîroka xebat û berxwedana gelê Kurdistanê de pire di evraz û nişêvî û Partî beşdareke serekî di serkeftin û destkeftan bûye û di qonaxên dijwar de her dem xwe bi berpirs zaniye. Di hemû qonaxan de Partî wekî amrazek bûye di destê gelê Kurdistanê de ji bo mîsogerkirina maf û destkeftan û kûrtirkirina fireh alî û birayetî û pêkvejiyanê û rola xwe ya pêşeng di hemû warên jiyana siyasî ya Kurdistanê de parastiye.

Damezrandina Partiya Demokrata Kurdistanê, ji bo perçeyên din ên Kurdistanê jî cihê hêvî û serhildanê bû û ji dayikbûna Partî destpêkeke nû bû ji bo têkoşîn û xwe radestnekirin û nehiştina bêhêviyê. Cihê şanaziyê ye Partiya Demokrata Kurdistanê xwe bi tu îdeolojiyeke teng û hizrî ya şovenî û tundiyê ve girênedaye û bûye sêwanek ji bo wê yekê ku hemû pêkhatên neteweyî û olî yên Kurdistanê di bin de kom bibin û eve bi xwe destkefteke bêwêne û serdemiyane bû di pêşketina hizra siyasî ya li Kurdistanê de. Partî her dem hilgirê peyama aştiyê bûye û berdewam jî amade bûye ji bo berevanîkirina Kurd û Kurdistanê.

Di dema niha de, aramî û parastina Kurdistanê û bihêzkirina pêkvejiyan û aramî û birayetî û tebayî ya di navbera hemû pêkhat û aliyên siyasiyan û bihêzkirina dam û dezgehên Herêma Kurdistanê ewlewiyeta serekî ya siyaseta Partî ye. Her wiha Partî tekez li wê yekê dike ku, doza rewaya gelê Kurdistanê pêwîst e di rêya aştî û hev duu têgihîştinê û dawiya bi zimanê înkar û xwesepandinê bêanîn û bê çareserkirin. Di derbarê rewşa Iraqê jî mixabin ew sedemên ku bûne hokarên serhildana teror û nearamiyê hê jî mane. Her li vî warî de ez bawerim hilbijartinên paşerojê ya Iraqê dikarê bibe dergeheke baş ya ji bo nûbûna proseya siyasî û çespandina îradeya welatiyan ya ji bo gûhertin û gihîştina bi aramiyê.

Di vê salvegera pîroz de, pêwîst e hemû partî di asta mezinahiya dîrokê û qurbanîdana partiyên xwe de bin û tu demekê ewe ji bîra wan neçê ku Partî (PDK) partiyeke xwediyê dozekê ye û xwediyê rêbaza Barzanî ye û bi navê rizgarî û xizmeta Kurdistanê hatiye damezrandin. Pêwîst e ji berê bihêztir rûbirûyê gefan bibe û derfetan jî ji bo bihêztirbûna Kurdistanê bikar bînin û erkê xwe yê ji bo pêşxistina avadanî û pêkvejiyan û tebayî ya Kurdistanê, bi baştirîn awayî encam bidin.

Mesûd Barzanî

16.08.2021