Polîsên Tirkiyê îro li Diyarbekirê gelek jinên siyasetmedar û çalakvan desteser kirin

PeyamaKurd - Di saetên serê sibehê da, li bajarê Diyarbekirê ya Bakurê Kurdistanê, polîsên Tirkiyê bi ser gelek malan da girtin û Berdevka Tevgera Jinên Azad Ayşe Gokkan jî di nav da, gelek jin desteser kirin.

Îro Sêşemê hêzên ewlekariyê yên Tirkiyê li navend û navçeyên Diyarbekirê bi ser gelek malên siyasetmedar û çalakvanên jin ên Kurd da girtin.

Piştî pişkinîna malên wan, Berdevka Tevgera Jinên Azad (TJA) Ayşe Gokkan, Berdevka Platforma Jinên Rojnameger a Mezopotamya (MKGP) û Edîtora Jinnewsê Ayşe Guney, Hevseroka Federasyona Komeleyên Hiqûq û Piştevaniyê ya Malbatên Girtî û Hikumxarên Med (MED TUHAD-FED) Elîf Haran, Endama Komeleya Alîkariya Bi Malbatên Girtiyan re (TUAY-DER) Rabîa Ataş, Endama Meclîsa Şaredariya Rezanê Panayir Çelîk, Aktîvîsta TJAyê Zekiye Guler û gelek jinên din hatin desteserkirin.

Li gor agahiyên hatine belavkirin, polîsan bi ser malên rêvebera TUAY-DERê Bahar Akyapi û Hevseroka HDPê ya Sûrê Hatûn Yildiz da jî girtine, lê ji ber ew ne mal bûn, nehatine desteserkirin.

Di derbarê sedema girtina wan da hîn ti zanyarî nehatiye zanîn.