Rapora AP hat qebûlkirin: YEyê derî jî li Tirkiyeyê venekir!

PeyamaKurd – Di dengdanê de rapora îsal a Tirkiyeyê ya Parlamentoya Ewropayê (PE) hat qebûlkirin. Di raporê de hat ragihandin ku heta 'guhertineke radîkal' a rola Tirkiyeyê pêk neyê, pêvajoya endamtiya Tirkiyeyê ya Yekîtiya Ewropayê (YE) ji nû ve nayê destpêkirin.

Serokkomarê Tirk Tayyîp Erdogan di berdêla erêkirina Swêdê ya ji bo endametiya NATOyê de dixwest rê li ber Tirkiyeyê veke di nava Yekîtiya Ewropayê de; Lêbelê, welatên Ewropî ev yek 'bê girîng' dîtin.

Di muzakereyên 'endamtiya tam' a bi Tirkiyeyê re ku ji sala 2005an û vir ve didomin û di salên dawî de bi temamî hatine rawestandin, hewl dide çarçoveyek nû diyar bike da ku ji astengiyê derbas bibe.

Rapora AP Tirkiyeyê ya îsal bi 434 dengan li hemberî 18 dengan li Lijneya Giştî hat qebûlkirin. 152 parlementeran jî bêalî man.

Pêvajo wê ji nû ve dest pê neke

Di raporê de hat destnîşankirin, pêvajoya endametiyê di şert û mercên heyî de nikare bi pêş bikeve û herwiha bal kişande ser wê yekê ku "Heta ku hikûmeta Tirkiyeyê rêgezên radîkal neguhere, nikare ji nû ve destpê bike."

Daxwaza hevkariya stratejîk

Di raporê de ji bo ku alî ji vê xitimandinê rizgar bibin, hat gotin ku têkiliya YE-Tirkiyeyê "pêwîst e li gorî rastiyan ji nû ve were nirxandin" û hat xwestin ku nexşerêyek ku ber bi "hevkariya stratejik" ve diçe were xêzkirin.

Demokratîkbûn

Di rapora îsal de, Konseya Ewropayê ya ku Tirkiye jî endama wê ye, ji bo Tirkiyeyê careke din wekî navnîşana demokratîkbûyîn, mafên mirovan û dewleta hiqûqê tê binavkirin.

Girîngiya li ser biryarên Kavala û Demîrtaş

Hat bibîrxistin ku biryarên Komîteya Wezîran a Konseya Ewropayê û AÎHM li ser Enqereyê ferz e. Girîngiya li ser biryarên AÎHMê yên derbarê Osman Kavala û Selahattîn Demîrtaş de tê dayîn.

Pirsgirêka Kurd

Parlamentoya Ewropayê xwest ku li ser pirsgirêka Kurd pêvajoyeke siyasî ya nû û bi rûmet bide destpêkirin.