Resnûdî: Pistî serdana Tehranê têkiliyên Kurdistan û Îranê bihêztir bûne

PeyamaKurd - Konsulê Giştî yê Îranê yê Hewlêrê Nesrula Reşnûdî got ku piştî serdana Nêçîrvan Barzanî ya Tehranê pêwendiyên Îran û Herêma Kurdistanê bihêztir bûne.

Nesrula Reşnûdî, eşkere kir ku dê Berpirsê Wezareta Karên Derve yê Îranê Elî Baqirî roja Pêncşemê 13ê Hezîranê biçe Bexdayê û roja Înê jî bigihîje Hewlêrê.

Li gorî nûçeya Rûdawê Reşnûdî got, îsal jî ziyaretkarên Şîe bi deriyên Temerçîn- Hacî Omeran û Başmaxê re tên Herêma Kurdistanê û ji wir jî diçin ser mezarên pîroz ên Şîeyan ên li başûrê Iraqê.

“Pêwendiyên Hewlêr û Tehranê baştir bûne”

Herwiha Nesrula Reşnûdî behsa pêwendiyên baş ên navbera Îran û Herêma Kurdistanê jî kir û da xuyakirin: “Piştî serdana Serokê Herêma Kurdistanê Nêçîrvan Barzanî ya Îranê, pêwendiyên aliyan bihêztir bûne û niha di rewşeke baş de ne.”

Reşnûdî anî ziman, dê Elî Baqirî li Hewlêrê bi Serok Mesûd Barzanî, Serokê Herêma Kurdistanê Nêçîrvan Barzanî û Serokwezîrê Herêma Kurdistanê Mesrûr Barzanî re bicive.