Senatorên Amerîkî banga cezakirina Tirkiyê li Pompeo kirin

PeyamaKurd – Senatorên Amerîkayê Robert Menendez û Chris Von Hollen ji Wezîrê Derve Mike Pompeo daxwaz kirin, pêwîst e bi Yekîtiya Ewropayê re ji bo ferzkirina cezayên giştî û hevpar li dijî aboriya Tirkiyê hevnêrîn bin.

Robert Menendez û Chris Von Hollen di nameya xwe ya beriya civîna Pompeo bi wezîrê derve yê Yunanistanê Nikos Dendias de wiha gotin:

"Heke dewleta Tirk tevgerên xwe yên derqanûnî li rojhilatê Deryayê Spî domandin, divê Amerîka û Yekîtiya Ewropayê (YE) bi lez planekê ji bo ferzkirina cezayên hevpar û giştî li ser warên sereke yên aboriya Tirkiyê ferz bikin."

Her du senatoran da xuyakirin: “Divê Pompeo tevahiya tedbîrên pêwîst bigire da ku Tirkiye neçar bike ku keştiyên xwe ji herêma aborî ya taybet a Yunanistanê derxe û li gorî qanûnên navdewletî tevbigere.”

Robert Menendez û Chris Von Hollen gotin: “Heger Amerîka di vî warî de û di vê dema krîtîk de bi bin ket, wê asta nakokiyê mezintir bibe.”