Serok Barzanî li ser gesedanên li Sûriyeyê daxuyanî da

PeyamaKurd – Serok Mesûd Barzanî li geşedanên dawî yên li Sûriyeyê daxuyaniyek da. 

Di 27ê mijdarê de li gundewarên li rojavayê parêzgeha Helebê ya li bakurê Sûriyeyê di navbera hêzên artêşa Sûriyeyê û grûpên çekdar ên dijî rejîmê de şer derket.

Heta niha, ji bilî Helebê; bajarên Himus, Hema û Der’a û Suweydayê jî ji destên artêşa Sûriyeyê ya hukûmeta Beşar Esed derketine û komên bi pêşengiya HTŞyê wan bi rê ve dibe.

Serok Barzanî li ser geşedanên ku li Sûriyeyê û Rojavayê Kurdistanê diqewimin, îro 07.12.2024an daxuyaniyek nivîskî belav kir. 

Daxuyaniya ku li ser hesabê Xê ya mekteba siyasî ya Partiya Demokrat a Kurdistanê hat belavkirin, bi vî awayî ye:

“Bi navê Xwedayê dilovan û dilovîn,

Em bi eleqedariyeke mezin bûyerên dawî û guherînên li Sûriyê diqewimin dişopînin, ji ber ku ev geşedan û bûyer bandoreke rasterast li ser siberoja siyasî, ewlehî û aramiya Sûriyeyê û tevahiya herêma me dikin.

Em hêvîdar in ku ev pêşketin û guherînên li Sûriyeyê bibin sedem ku diyalog û jihevtêgihîştin bibe bingehek ji bo çareserkirina arîşeyên nakok, û tu reftarek neyê kirin ku dê bibe sedema kûrbûna nakokiyên neteweyî û mezhebî di navbera pêkhateyên Sûriyeyê de.

Her wiha em li bendê ne ku aliyên pêwendîdar bi rêyên aştiyane bigihên rêkeftinekê ku ew ê di berjewendiya hemû pêkhateyên Sûriyê de be û li wir pêk ve jiyana hevbeş, aştî û aramiyê pêk bînin.”

Mesûd Barzanî

7 Kanûnê, 2024