Tevgera Goran li ser biryara PDKê ya hilbijartinan daxuyanî da

PeyamaKurd - Tevgera Goran piştî helwesta Partiya Demokrat a Kurdistanê (PDK) ya beşdarnebûna hilbijartinên Parlamentoya Kurdistanê, îro 19ê Adarê daxuyaniyek belav kir û  ragihand, “Pêdiviya me bi hilbijartinên pak û bi beşdarbûn û têgihiştina hemû aliyên siyasî heye.”

Di daxuyaniya Goranê de hatiye gotin: “Ya herî girîng ew e ku bi rêya Parlamentoya Kurdistanê ya hilbijartî, nûnertiya gelê kurdistanê bikin, ji bo parastina mafên destûrî yên Herêma Kurdistanê.”

Hêjayî bibîrxistinê ye, Polîtburoya Partiya Demokrat a Kurdistanê (PDK) 18ê Adara 2024an li ser biryara Dadgeha Federalî ya Iraqê ya hilweşandina kotaya pêkhateyan û destwerdana hilbijartinên Kurdistanê ragihand ku ew beşdarî hilbijartinên ku bi awayekî neqanûnî û nedestûrî têne kirin, nabin.

Polîtburoya PDKê daye xuyakirin, “Em aliyên Hevpeymaniya Îdareya Dewletê dixin beranberî berpirsyarîtiya niştîmanî di bicihneanîna destûrî û tevaya xalên lihevkirina siyasî û îdarî yên pêkanîna kabîneya niha ya Hikûmeta Îraqê bi serokatiya Mihemed Şiya Sûdanî de, berevajî wê yekê jî em nikarin li ser proseya siyasî berdewam bin”.