Tîma alîkariyê ya Herêma Kurdistanê heta ku pêwîstî pê hebe wê li Bakur be

PeyamaKurd - Berpirsê Daîreya Têkiliyên Derve yê Hikûmeta Herêma Kurdistanê Sefîn Dizeyî li ser tîma alîkariyê ya ku ji bo erdhejê şandine Bakurê Kurdistanê got, çiqas hewce bike ew ê li wir bimînin û diyar kir: “Çi ji destê me bê em amade ne bikin, ev mijareke mirovî ye”.

Dizeyî li ser navê gel û hikûmeta Hikûmeta Herêma Kurdistanê sersaxî da gelê Tirkiyê û Bakurê Kurdistanê û got: “Rehma Xwedê li miriyan be, Xwedê şifayê bide birîndaran”.

Ji bo ekîba alîkariyê ya ku bo Bakurê Kurdistanê hatiye şandin Dizeyî da zanîn: “Bi telîmata Birêz Serokwezîrê me Mesrûr Barzanî amadehî hat kirin. Alîkariya tibî, mirovî û tîma lêgerînê ji Xabûrê bi rê ket”.

Dizeyî diyar kir: “Tîma bi qasî 150 kesî pêk tê li Îslahiyeya navçeya Dîlokê ye. Hem lêgerînê dikin û hem jî xizmeta tenduristiyê didin. Weqfa Alîkariyê ya Barzanî jî li wir piştgiriya alîkariyê dike”.

Dizeyî eşkere kir, tîma ku wan şandiye ji 35 ambulans û 55-60 wesayîtan pêk tê, çiqas hewce bike wê li wir bimîne û destnîşan kir: “Çi ji destê me bê em amade ne bikin, ev mijareke mirovî ye”.

Herwiha Dizeyî got ku niyeta wan heye ew ji bo Efrînê jî alîkariyê bişînin.