UNHCR: Heta niha 726 kesên sivîl di serê Rûsya – Ukraynayê de hatine kustin

PeyamaKurd – Neteweyên Yekbûyî bi daxuyaniyekê amarên koçberên Ukraynayê ragihand û da zanîn, heta niha 726 kesên sivîl di şerê Rûsya – Ukraynayê de hatine kuştin, ji bilî wê 1174 kes birîndar bûne, 3 milyon û 63 hezar kes ber bi welatên cîran koçber bûne.

Li gor daxuyaniya Komîsyona Bilind a Karûbarên Penaberan a ser bi Neteweyên Yekbûyî (UNHCR) belav kir, ji 24ê Sibatê heta 15ê Adarê, 3 milyon û 63 hezar û 95 kes ji Ukraynayê berê xwe dane welatên cîran, nîvê wan jî xwe spartine Polandayê.

Herwiha Neteweyên Yekbûyî eşkere kir: “Milyonek û 875 hezar û 45 kes çûne Polandayê, 467 hezar û 703 kes çûne Romanyayê, 344 hezar û 454 kes çûne Moldovayê, 272 hezar û 943 kes berê xwe dane Macaristan, 220 hezar û 977 kes bo Slovakyayê, 155 hezar û 841 kes çûne Rûsyayê û 1816 kes jî berê xwe dane Belarusê.”

Neteweyên Yekbûyî destnîşan kir, herî kêm 726 sivîl li Ukraynayê ji ber êrîşên Rûsyayê hatine kuştin.