YNKê dijatiya xwe ya bo lihevkirina PDK û Tirkmenên Kerkûkê ragihand: Em qebûl nakin!

PeyamaKurd – Berdevkê Yekîtiya Niştimaniya Kurdistanê (YNK) Seidî Ehmed Pîre, bêyî bûyerên 16ê Cotmeha 2017an ên radestkirina Kerkûkê bo hêzên Iraqê bibîr bîne, li dijî lihevkirina PDK û Tirkmenên Kerkûkê derket û got: “Em vê gavê wekî firotina Kerkûkê dibînin.”

Parlamenterê Eniya Tirkmenan ê Kerkûkê (ITC) Erşad Salihî ragihandiye ku wan li ser mijara serokê Encûmena Parêzgeha Kerkûkê û diyarkirina parêzgarê Kerkûkê bi Partiya Demokrat a Kurdistanê (PDK) re li hev kiriye.

Berdevkê Yekîtiya Niştimanî ya Kurdistanê (YNK) Seidî Ehmed Pîre li ser mijarê diyar kir ku ew dê di derbarê Kerkûkê de peymaneke wiha qebûl nekin.

Pîre ji Rûdawê re gotiye: “Rêkeftina PDK û Eniya Tirkmenan a salek parêzgarî ji Kurdan re, salek ji Tirkmenan re û salek jî ji Ereban re parçekirina Kerkûkê ye. Rêkeftina di navbera PDK û Eniya Tirkmenan de tê wê wateyê ku Kerkûka wekî dilê Kurdistanê dibînin, didin ber firotinê.”

Erşad Salihî li ser rûniştinên meclîsa parêzgehê, hilbijartina serokê meclîsê û diyarkirina parêzgarê Kerkûkê wiha gotiye: “Em bi Partiya Demokrat a Kurdistanê (PDK) rê li ser rêveberiya hevbeş a Kerkûkê hev ra ne. Em hêvî dikin ku birayên Ereb lihevkirinê binirxînin. Em dixwazin hemû aliyên siyasî beşdarî rêveberiya Kerkûkê bibin ji ber ku wekî nûnerê pêkhateyan beşdarî hilbijartinan bûn û deng wergirtin. Em di wê baweriyê de ne ku divê hemû pêkhate bi rêya partiyên siyasî li ser diyarkirina parêzgarekî hevpar li hev bikin.”

Salihî di derbarê posta parêzgariyê de jî diyar kir ku ji ber ev demek e di navbera aliyan de lihevkirin çênebûye parêzgar nehatiye diyarkirin û got, wan bi PDK re li hev kiriye û di çarçoveya lihevkirinê de bi gihandina 4 kursiyan dikarin bi Ereban re hikûmeteke herêmî ava bikin.

Salihî da zanîn ku di çarçoveya lihevkirina bi PDK re, her sal wê parêzgarî ji aliyê nûnerê yek pêkhateyê ve were kirin posta parêzgariyê salekê ji Kurdan re, salek ji Tirkmenan re û salek jî ji Ereban re dibe.

18ê Çileya 2023an di hilbijartinên herêmî yên encûmena parêzgeha Kerkûkê de, Tirkmenan 2, Ereban 6 kursî, YNK 5 kursî, PDK 2 kursî û Xirîstiyanan jî bi rêya kotayê kursiyek bi dest xistibûn.

Hêjayî gotinê ye ji ber êrîşên DAIŞê yên piştî sala 2013an û pirsgirêkên ewlehiyê hilbijartin nedihatin lidarxistin.