Ajansa APyê ji ber îhlalkirina azadiya derbirinê doz li birêvebiriya Trump vekir

PeyamaKurd – Ajansa Associated Pressê (AP) bi hinceta ku azadiya derbirînê hatiye binpêkirin, li dijî 3 rayedarên birêvebiriya Serokê Amerîkayê Donald Trump doz vekir.

APyê duh li Dadgeha Navçeya Dewletên Yekbûyî ya Washingtonê dozek li dijî berpirsên birêvebiriya Trump vekir, bi îdiaya ku bi astengkirina gihandina wan ji bûyerên serokatiyê re mafê wan ê axaftinê hatiye binpêkirin, û bi îdiaya ku Qesra Spî di nav ”hewldanên nedestûrî de ye ji bo kontrolkirina azadiya axaftinê”.

Di daxwaznameyê de tê gotin ku “Çapemenî û hemû mirovên li Dewletên Yekbûyî yên Amerîkayê xwedî maf in ku gotinên xwe bi xwe hilbijêrin û ji hêla hikûmetê ve rastî midaxeleyê neyên.”

Ajansê di daxwaznameyê de got:

“Ev êrîşa armanckirî ya li ser serxwebûna edîtoriya APyê û şiyana wê ya komkirin û raporkirina nûçeyan di bingeh Guherîna Yekem e. Divê dadgeh demildest vê yekê çareser bike.”

Di dozê de navê Serfermandarê Qesra Spî Susan Wiles, Alîkara Serokê Karmend Taylor Budowich û Berdevka Çapemeniyê Karoline Leavitt heye.

Li gor nûçeyên medyaya neteweyî dadgerê herêmî yê Amerîkayê Trevor McFadden ku namzedê Serokê Amerîkayê Donald Trump e ji bo dozê hat tayînkirin.

Hêjayî gotinê ye ku ev doz 10 roj piştî ku Qesra Spî dest bi sînordarkirina gihandina ajansa nûçeyan kiribû, hat vekirin.

Berdevka Qesra Spî Karoline Leavittê der barê dozê de ku ji aliyê APyê ve hatiye vekirin daxuyaniyek da û got,

“Em ê wan li dadgehê bibînin. Em hest pê dikin ku em rast in. Em ê piştrast bikin ku rastî û rastbûn her roj li Qesra Spî heye.”

Alîkarê Serfermandarê Qesra Spî û Sekreterê Kabîneyê Taylor Budowich hefteya borî li ser platforma medyaya civakî ya Xê AP rexne kir, û hêrsa xwe li ser bikarneanîna ajansê ya peyva “Amerîkaya Kendavê” anî ziman.