Amarên 4 mehên protestoyên Îran û Rojhilatê Kurdistanê hatin eskere kirin

PeyamaKurd – Xwepêşandanên protestoyî yên piştî kuştina keça Kurd Jîna Emînî di 16ê Îlona 2021ê de, 4 meh in li Îran û Rojhilatê Kurdistanê dewam dikin ku heta niha bi sedan welatiyên sivîl bi destê hêzên rejîma Îranê hatine kuştin.

Ajansa Çalakvanên Mafên Mirovan a Îranê (HRANA) amarên dawî yên protestoyên seranserî yên li Îranê eşkere kir.

Li gorî amarên hatine eşkerekirin heta niha 525 xwepêşander bi gule yan jî îşkence û êrîşên hêzên rejîma Îranê hatine kuştin ku 71 kes ji wan zarok in.

Herwiha heta niha zêdetir 19 hezar û 571 kes hatine binçavkirin ku bi tenê nasnameya 5 Hezar û 29 kesan hatiye zanîn.

Dîsa li gorî amaran 168 zarok û 714 xwendekar ji aliyê hêzên rejîma Îranê ve hatine binçavkirin û cezayê girtîgehê li ser 736 kesan hatiye sepandin û 4 kes jî hatine îdamkirin.

Metirsîya cezayê îdamê ji bo 110 kesan heye

Rejîma Îranê 12 hezar û 318 meh girtigeh bi ser kesên girtî de sepandiye û metirsî heye cezayê îdamê ji bo 110 binçavkiriyan bê sepandin.

Heta niha li 146 bajarên Kurdistan û Îranê 1,260 çalakiyên protestoyî li zanîngeh û bajaran hatine lidarxistin.

Herwiha li gorî amarên ji Rojhilatê Kurdistanê jî ji destpêka protestoyên Jîna Emînî ve 122 Kurd bi destê hêzên Îranê hatine kuştin.