Amerîka: Cîgirê Waliyê DAISê li Sûriyê û berpirsekî din ê wê rêxistinê hatin kustin

PeyamaKurd – Hêzên Amerîkayê duyemîn operasyon di nav axa Sûriyê û Rojavayê Kurdistanê de li dar xistin û Amerîkayê bi daxuyaniyekê diyar kir, Cîgirê Waliyê DAIŞê li Sûriyê û berpirsekî din ê wê rêxistinê hatine kuştin.

Li gor Fermandariya Navendî ya Hêzên Amerîkayê (CENTCOM) di daxuyaniyeke nivîskî de eşkere kir: “Êvara roja Pêncşemê di saet 18:32yan de bi dema Sûriyê hêzên Amerîkayê êrîşeke esmanî ya serkeftî li bakurê Sûriyê pêk anîne.”

CENTCOMê ragihand: “Cîgirê Waliyê DAIŞê Ebû Haşim El-Omewî û berpirsekî din ê pilebilind ê wê rêxistinê ku pê re bûye, hatine kuştin.”

Fermandariya Navendî ya Hêzên Amerîkayê di derbarê zerarên operasyonê de got, tu zerarek negihîştiye xelkên sivîl, herwiha tu serbazekî Amerîkî birîndar nebûye û nehatiye kuştin û tu zerarek negihîştiye kelûpelên serbazî yên wî welatî.

Herwiha Fermandarê Fermandariya Navendî ya Hêzên Amerîkayê Michael Erik Kurilla derbarê operasyonê de destnîşan kiriye: “Ev êrîş şiyana DAIŞê ji bo ne aramkirina navçeyê û êrîşkirina ser hêzên me û hevalbendên me kêm dike.”

Herî dawî Erik Kurilla da zanîn, hêzên wan wê li navçeyê bimînin ji bo ku ji têkçûna DAIŞê piştrast bibin.