Dadgeha Bangladesê cezayê darvekirinê da Sêxa Hesîna

PeyamaKurd- Dadweriya welatê Bangladeşê li ser serokwezîra berê Şêxa Hesîna cezayê darvekirinê sepand.

Desteyek ji 3 dadgeran a Dadgeha Tawanên Navneteweyî ku dadgeha tawanên şer a navxweyî ya Bangladeşê ye, îro Duşemê biryar da ku Hesîna fermana kuştina derveyî qanûnê daye û bûye sedema kuştina bi sedan kesan.

Yek ji dadgeran di dema darizandinê de got: "Şêxa Hesîna fermanên kuştinê dane û nikariye tedbîrên qanûnî bigire û bi vê yekê tawanên li dijî mirovahiyê kiriye."

Dadgeran got, "pir eşkere ye" ku wê çalakvanên partiya xwe teşwîq kiriye û fermana kuştin û jiholêrakirina xwendekarên xwepêşander daye.

Li gorî dadgehê, tê texmînkirin ku di hefteyên xwepêşandanên sala 2024an de nêzîkî hezar û 400 xwepêşander hatine kuştin û nêzî 25 hezar kes jî birîndar bûne.

Şêxa Hasîna ji sala 2009an heta hilweşandina hikumeta wê ya sala 2024an serokwezîra Bangladeşê bû.