Dadgeha Federal a Iraqê gilîyê dijî Statuya Herêma Kurdistanê red kir

PeyamaKurd - Dadgeha Bilind a Federalî ya Iraqê, derbarê gilîkirinên dijî statuya Herêma Kurdistanê de biryareke girîng da.

Parlamenterê serbixwe yê Parlamentoya Iraqê Elî Şedad, li dijî statû û deshilatên bi Destûra Iraqê bo Herêma Kurdistanê re hatine dayîn gilî li Dadgeha Federal kiribû û di nameya gilîkirinê de gotibû, “Bendên 5, 13, 19, 120 û 125 ên taybet bi cîbicîkirina destûrê, serweriya yasa û serxwebûna dadgehan, danîna destûra Herêma Kurdistanê û garantîkirina mafên pêkhateyan binpê kirine”.

Herwiha Şedad li dijî Serokomarê Iraqê Berhem Salih, Serokê Parlamentoyê Mihemed Helbûsî, Serokwezîr Mistefa Kazimî û Serokê Herêma Kurdistanê Nêçîrvan Barzanî, Serokê Encûmena Bilind a Dadwerî ya Herêma Kurdistanê Ebdulcebar Ezîz û Serokê Komîsyona Bilind a Serbixwe ya Hilbijartinê ya Iraqê Celîl Ednan jî doz vekiribû.

Dadgeha Federal a Iraqê derbarê gilî de civiya û biryara redkirina gilîkirina wî parlamentarê Iraqê da û diyar kir, “Berjewendiya gilîkar bi vê dozê re nîne”.

Li ser mijarê Parlamenterê Partiya Demokrata Kurdistanê (PDK) li Parlamentoya Iraqê Şêrwan Dûberdanî got, Dadgeha Bilind di rûniştina xwe ya 3yê Tebaxê de giliyekî li dijî statuya Herêma Kurdistanê red kiriye ku ji aliyê parlamenterekî Iraqê ve ew gilî hatibû tomarkirin.