Encumena Saredariya Colemêrgê Viyan Tekçe wek Cîgira Hevsaredar hilbijart

PeyamaKurd - Encumena Şaredariya Colemêrgê, li dijî qeyûmtayînkirina Wezareta Navxweyî ya Tirkiyeyê, civîn pêk anî û bi yekdengî Viyan Tekçe wek Cîgira Hevşaredar hilbijart

Di 3ê Pûşperê de, ji Şaredariya Colemêrgê ya di bin rêveberiya Partiya Wekheviya Gelan û Demokrasiyê (DEM Partî) de qeyûm hatibû tayînkirin. 

Hevşaredar Mehmet Siddik Nakit ku piştî li Wanê hate desteserkirin, bi biryara Wezareta Navxweyî ya Tirkiyeyê ji peywirê xwe hatibû dûrxistin û di doza ku 10 sal berê lê hatibû vekirin de 19 sal û 6 meh ceza lê hat birîn. 

Di dema ku dorpêça polêsên Tirk a Şaredariya Colemêrgê didomiya, endamên Encumena Şaredariyê yên ku ji DEM Partiyê hatibûn hilbijartin li hev civiyan.

Di civîna ku li avahiya parêzgehê pêk hat de, endamên encumenê yên ku rêveberiya qeyûm red kirin, daxuyaniyek belav kirin û Cîgira Hevşaredar hilbijartin. 

Encumena şaredariyê bi yekdengî Viyan Tekçe wekî Cîgira Hevşaredar hilbijart.

Alîkarê Hevserokê Giştî yê DEM Partiyê yê Berpirsyarê Rêxistinkirinê Vezîr Coşkun Parlak, di xwendina daxuyaniyê de diyar kir ku gelê Colemêrgê di hilbijartinan de helwesta xwe ya li dijî her cure sextekarî û mêtingeriyê bi awayekî zelal nîşan daye û diyar kir ku gelê bajêr her tim parastina xwe kiriye û xwedî li vîna xwe derketiye.