Hevserokên HDPê Sancar û Buldan li navenda CHPê bi Kiliçdaroglu re civiyan

PeyamaKurd - Hevserokên Giştî yên HDPê Pervîn Buldan û Mithat Sancar di çarçoveya serdanên xwe yên partiyên opozîsyona Tirkiyê de, îro Sêşemê serdana navenda CHPê li Enqerê kirin û ligel Serokê Giştî yê CHPê Kemal Kiliçdaroglu re civiyan.

Piştî hevdîtinê Kiliçdaroglu, Sancar û Buldan civîneke rojnamevanî ya hevbeş li dar xistin.

Serokê Giştî yê CHPê Kemal Kiliçdaroglu ji bo serdanê spasiya hevserokên HDPê kir û got, ew li ser mijar û pirsgirêkên sereke yên li Tirkiyê axivîne û diyar kir, ev serdan û civîn ji bo wan gelek girîng e.  

Hevserokê Giştî Mîthat Sancar jî spasiya CHPê kir û got, li Tirkiyê krîza rêvebirinê heye û divê ew vê kêşeyê çareser bikin û di heman demê de pergalek nû bînin Tirkiyê û diyar kir, di bin daxwaza wan a hilbijartina pêşwêxt de krîza rêvebirinê heye û divê ew bi rêya diyalog, muzakere û şêwiran aştiya civakî ava bikin.

Pervîn Bûldan jî got: “Pêdiviya Tirkiyeyê bi têgihiştin û rêveberiyê nû heye. Û bi biryara hilbijartinên pêşwext Tirkiye dê teqez rêveberiyeke nû û feraseteke nû bibîne. Me pêşniyaza xwe ya ji bo hilbijartina pêşwext jî pêşkêşî Serokê birêz Kiliçdaroglu kir. Helbet dê di nav xwe de bişêwirin û di zûtirîn demê de nêrînên xwe ji me re ragihînin. Careke din spasiya Serokayetiya rêzdar û şanda pê re dikim ku me qebûl kirin û nêrînên xwe yên girîng bi me re parve kirin. Ev serdan dê di rojên pêş de jî berdewam bikin.”