Hikûmeta Kurdistanê 29 hezar û 400 xaniyan ji bo hejaran ava dike

PeyamaKurd – Hat ragihandin ku wê Hikûmeta Herêma Kurdistanê 9 hezar û 400 xaniyên din li 20 hezar xaniyên ku biryar hatibû dayîn bo welatiyên hejar werin avakirin, zêde bike û hejmar bigihe 29 hezar û 400 xaniyan.

Wezîrê Avadankirin û Niştecihbûnê yê Herêma Kurdistanê Dana Ebdulkerîm ragihand, wê 29 hezar xaniyan ji bo hejaran bên avakirin û 9 hezar ji wan jî dê bi çavdêriya Wezareta Avadankirin û Niştecihbûnê bên çêkirin.

Dana Ebdulkerîm diyar kir, 20 hezar xanî ji aliyê Desteya Veberhênanê ve têne avakirin û 9 hezar û 400 xanî jî wê bi çavdêriya Wezareta Avadankirinê bêne avakirin ku hejmar digihîje 29 hezar û 400 xaniyan.

Ebdulkerîm da zanîn ku wê 20 hezar apartman li heşt cihên sereke, di nav de çar parêzgeh û çar îdareyên serbixwe, wekhev werin dabeşkirin.

Hêjayî gotinê ye, 31ê Gulanê bi serokatiya Serokwezîr Mesrûr Barzanî civînek ji bo çavdêrîkirina bicihanîna avakirina 20 hezar xaniyên hejaran hatibû lidarxistin.