Îmad Cemîl: Ji bo hilbijartinan em li benda bersiva Serokatiya Herêma Kurdistanê ne

PeyamaKurd – Serokê Tîma Ragihandinê ya Komîsyona Bilind a Serbixwe ya Hilbijartinê ya Iraqê Dr. Îmad Cemîl da zanîn ku ji bo hilbijartinên parlamentoyê ew li benda bersiva Serokatiya Herêma Kurdistanê ne.

Dr. Îmad Cemîl ji K24ê re doh diyar kiriye ku komîsyonê ji bo diyarkirina roja hilbijartinên parlamentoyê nameyek ji Serokatiya Herêma Kurdistanê re şandiye û got, em li benda bersiva Serokatiya Herêma Kurdistanê ne.

Cemîl amaje bi wê yekê jî kir ku alavên ku hem di komîsyonê de hem jî di proseya hilbijartinê de bên bikaranîn ji bo hilbijartinên Parlamentoya Kurdistanê amade ne û got, “Ya ku maye tomarên namzedan û lîsteyan e. Ji bo diyarkirina roja hilbijartinê me hemû agahî ji Serokatiya Herêma Kurdistanê re şandin."

Dr. Îmad Cemîl derbarê tiliyên çend dengdêran de ku di hilbijartinên berê de nayên xwendin de ev tişt anî ziman:

"Em ê ji bo vê hilbijartinê bi awayekî cidî hewl bidin ku şopa tiliyên wan kesan dîsa bigirin."

Di daxuyaniya xwe ya doh 28ê Gulanê de ji K24ê re, Berdevka Komîsyona Bilind a Serbixwe ya Hilbijartinan a Iraqê Cumana Galayî ragihand, Desteya Komîseran daxwaz ji Serokatiya Herêma Kurdistanê kiriye ku roja nû ya hilbijartinên Parlamentoya Kurdistanê diyar bike.

Parlamentoya Iraqê roja 22ê Gulanê dema Komîsyona Bilind a Serbixwe ya Hilbijartinan 6 mehan dirêj kir.

Roja 21ê Gulanê Dadgeha Bilind a Federal a Iraqê biryara Komîteya Dadwerî ya Hilbijartinan pesend kir ku ji 100 kursiyên Parlamentoya Kurdistanê 5 kursî bide pêkhateyan.

Biryar hat dayîn ku kursiyên ku ji pêkhateyan re hatine veqetandin bi vî awayî bên belavkirin:

1. Hewlêr: 2 kursî (yek ji Xiristiyanan re, ya din ji bo Tirkmenan)

2. Silêmanî: 2 kursî (yek ji mesîhiyan re, ya din ji bo Tirkmenan)

3. Duhok: 1 kursî ji bo Ermeniyan