Kazimî dest bi hevdîtinên avakirina hikûmetê kir

PeyamaKurd – Serokwezîrê raspartî bo avakirina hikûmeta nû ya Iraqê Mustefa Kazimî ji bo avakirina kabîneya xwe dest bi danûstandinê bi aliyên siyasî re kir.

Wezîrê Darayî û Cîgirê Serokwezîrê Iraqê Fûad Hûsên li ser hesabê xwe yê medya civakî ragihand ku ew bi Mustefa Kazimî re hatiye ba hev û li ser avakirina hikûmetê hevdîtin kirine.

Herwiha Serokomarê Iraqê Berhem Salih jî serdana mala Serokê Parlamentoya Iraqê Muhamed Helbûsî ya Feluceyê kiriye û li ser hikûmeta nû danûstandin kirine.

Berhem Salih, 9ê Nîsanê Serokê berê yê Îstixbarata Iraqê Mustefa Kazimî ji bo avakirina hikûmeta nû ya Iraqê erkdar kiribû û Herêma Kurdistanê jî piştgirîya xwe ji bo wî ragihandibû.

Kazimî li gorî destûra Iraqê divê di nav 30 rojan de kabîneya xwe ava bike û ji parlamenê baweriyê bistîne.