Kê navê Sêx Seîd li kolana Diyarbekirê kiriye? Ew belge va ne…

PeyamaKurd – Nûçeya ku qeyûmê Şaredariya Bajarê Mezin a Diyarbekirê navê Şêx Seîd li kolanekê kiriye, wek bombeyekê ket rojeva welêt. Lêbelê, rastî qet ne wekî ku ji raya giştî re xuya dikin in. Navê Kolana Şêx Seîd û 60 cihan ji aliyê Şaredarê wê demê Osman Baydemîr ve bi biryara meclîsa Şaredariya Bajarê Mezin a Diyarbekirê ya bi hejmara 274an a di 29/11/2011an de hatiye dayîn.

Li gorî agahiyên ku Serokê berê yê Baroya Diyarbekirê Cîhan Aydin daye, bi biryara meclîsê ya bi hejmara 241 a di 18/12/2014an de, navê Kurdî “Qada Şêx Seîd” li Qada Dagkapiyê hatiye dayîn. Hevşaredarên wê demê Gultan Kişanak û Firat Anli bûn.

'Serokên Daîreyê hatin darizandin'

Parêzer Cîhan Aydin bi bîr xist ku di serdema Wezîrê Karên Hundir ê wê demê Efkan Ala de derbarê Şaredar û Hevşaredarên Bajarê Mezin ê Diyarbekirê û hin serokên daîreyan de ji ber navê Şêx Seîd lêpirsîn hat vekirin û diyar kir:

“Rewşa şermê ye ku di derbarê bîranîna Şêx Seîd de daxuyaniyên bêexlaq, êrîşkar û ne rasteqîne tên kirin û hilbijartinên herêmî yên bên weke navgîna destkeftiyên siyasî tên bikaranîn. Dema ku dem û cih were wê gelê Kurd berteka xwe ya demokratîk eşkere bike. Ev mijar yek ji mînakên herî berbiçav ên nêzîkatiya du standard a rejîmê û dadweriyê ye ku pişta xwe dide şaredariyên Kurd. Dema ku Kurd ji ber navê Şêx Seîd tên darizandin, rejîm hewl dide ji vê yekê sûda siyasî bigire.”