Kurdistan | Li sînorên ‘Îran û Tirkiyê’ 200 xalên leskerî têne danîn

PeyamaKurd – Hat ragihandin ku ji bo parastina sînorên Herêma Kurdistanê amadekarî tê kirin 200 xalên leşkerî werin danîn û 3 hezar hêzên tevahiya wan Kurd li sînoran werin bicihkirin.

Fermandarê Hêzên Sînor ê Iraqê Muhammed Ebdulwehab ragihandiye ku wê hêzên sînorî yên ji bo parastina sînoran li 200 xalên nav sînorên Herêma Kurdistanê yên sînorên ligel Tirkiye û Îranê werin bicihkirin.

Fermandarê Iraqî gotiye, wê piştgiriyeke tam bo lojîstîka wan hêzan bê dayîn û ji bolî wesayîtên leşkerî kamerayên hesas ên çavdêriya ewlehiyê jî li wan xalên sînorî bên danîn.

Demek berê bi zêdebûna êrîşên Îran û Tirkiyê yên nav axa Herêma Kurdistanê re, ji bo wergirtina hêzên sînorî rêkeftin ligel hikûmeta nû ya Bexdayê, hatibû kirin.

Berdevkê Fermandariya Operasyonên Hevbeş a Iraqê Tehsîn Hefacî gotibû, li gorî biryara Wezareta Navxwe hêzên sînorî ji 50 hezar kesan pêk tên û ji wan jî 9 hezar ji leşkerên Herêma Kurdistanê pêk tên.

Berdevkê Herêma Yek a Pasevanên Sînor Karwan Xoşnaw jî ji bo hêza nû ya sînor diyar kiriye ku wê 3 hezar kesên nû bên wergirtin û hemû jî Kurd bin.

Biryar e çend rojên bê mercên serlêdana wan hêzan bê eşkere kirin ku kesên bixwazin bibin pasevanên sînor bi awayekî online serlêdanên xwe bikin.