Mesrûr Barzanî li Davosê axivî: Ev êrîs gelekî bêsedem e û nabe bi ti awayî bêbersiv bimîne

PeyamaKurd - Serokê Hikûmeta Herêma Kurdistanê Mesrûr Barzanî, li Korbeneda Aborî ya Cîhanê Davosê, di civîneke rojnamevanî de li ser êrîşên Îranê yên şeva borî li ser Hewlêrê got: “Di êrîşeke bê behane û nemerdane de dîsa Hewlêr hat armanckirin, nabe êrîşên li ser Hewlêrê bê bersiv bimînin”.

Mesrûr Barzanî ragihand: “Ev êrîş û dijminatiyên li hemberî Herêma Kurdistanê çi sedema wan nîne û bê behane ne, her tiştekî ji destê me hatî li Herêma Kurdistanê me kiriye, ji bo ku em zêdetir xizmeta xelkê xwe bikin û bi rengekî aştiyane jî pêwendiyên xwe bi welatên cîran re pêş bixin”.

Serokwezîr Barzanî got: “Mixabin, ew êrîş gelek bêsedem in û nabe bi çi rengan bê bersiv bimînin, em hêvîdar in Civaka Navdewletî alîkar be, ji bo ku ew êrîş bidawî bên ên ku tên ser Herêma Kurdistanê û rê bidin me ku em bikarin bi aştî û azadî li welatê xwe bijîn”.

Serokwezîr Mesrûr Barzanî li ser pirsa hebûna hêzên Amerîkayê li Herêma Kurdistanê û Irqaqê jî diyar kir: “Hêzên Amerîkayê bi lihevkirina Hikûmeta Iraqê li wê derê ne, erkê wan nehêlana terorê ye, hê jî teror li deverê berdewam e, ew êrîşa şeva borî hatiye kirin êrîşeke bêbehane û bêbnigeh e, pêdivîya me bi hevahengiya navdewletî heye ku em îstiqrarê ji bo Iraqê vegerînin”.

Li ser helwestên welatan Serokê Hikûmeta Herêma Kurdistanê got: “Me hinek hevdîtin û civîn hene, ev pirs dê bê behskirin. Piştî wan hevdîtinan, dê baştir ji bo me zelal bibe, ji bo ku em bizanim helwestên wan welatan wê çi bin”.