PKKê û TSKê derbarê serê Xakurkê de daxuyanî dan

PeyamaKurd- Wezareta Berevaniyê ya Tirkiyê derbarê operasyonên herêma Xakurkê ku dikeve herêma Kurdistanê de daxuyaniyek da û îdia kir ku 3 PKKyiyan jiyana xwe ji dest daye.

Wezareta Berevaniyê ya Tirkiyê li ser hesabê xwe ya medyaya civakî, derbarê ‘Operasyona Pençe’ ya ku 27ê Gulanê destpêkiribû daxuyaniyek da. Di wê daxuyaniyê de hatiye îdiakirin ku 3 PKKyiyan canê xwe ji dest daye.

Ji aliyê din ve milê leşkerî yê PKKê, Hêzên Parastina Gel (HPG) jî daxuyaniyek da û diyar kir ku balafirên şerî yên artêşa Tirkiyê bi balafir û helîkopterên Kobra herêma Xakurkê û hin deverên din ên derdorê bombebaran dike. HPG derbarê ziyanîn canî de tu hejmar eşkere nekir.

Ji aliyê din ve hêjayî bibîrxistinê ye ku li ser sînorê Idîrê di navbera artêşa Tirkiyê û gêrilayên PKKê de şer derketibû û di encama wî şerî de 2 leşkerên Tirkiyê jiyana xwe ji dest dabûn û 5 leşker  jî birîndar bûbûn.