‘Posta qeymeqamtiya Singalê li gorî encamên hilbijartinan mafê PDKê ye’

PeyamaKurd – Hat ragihandin ku Serokwezîrê Iraqê Mistefa Kazimî, biryara doh 26ê Nîsanê ya derbarê erkdarkirina Parêzgarê Neynewayê ji bo bicihanîna erkên Qaymeqamtiya Şingalê hilweşandiye û tê çaverêkirin kesekî din bo wê postê were diyarkirin.

Endamê parlamentoya Iraqê û qaymeqamê berê yê Şingalê Mehma Xelîl piştrast kir ku biryara erkdarkirina parêzgeha Mûsilê wek wekîlê Qeymeqamiya Şingalê û ji bo bicihanîna erkên wê, ji aliyê Kazimî ve hatiye hilweşandin.

Mehma Xelîl dibêje: “Li gor encamên hilbijartina parlamentoya Iraqê, di sala 2021 Partiya Demokrata Kurdistanê 3 kursiyên parlamentoyê yên Şingalê misoger kiriye. Berê jî PDK di nav encamûna Şingalê de xwediyê piraniyê bû, lewra posta Qeymeqamiya Şingalê mafê PDKê ye û bêyî PDK biryar li ser nayê dayîn.”

Hêjayî bibîrxistinê ye, Hikûmeta Herêma Kurdistanê û Hikûmeta Iraqê dawiya sala 2020an ji bo asayîkirina rewşa Şingalê rêkeftinek îmze kiribûn û li gorî wê rêkeftinê jî pêwîst bû îdareyeke nû bo Şingalê were diyarkirin û hêzên wê yên asayîşê jî ji xelkê deverê werin pêk anîn. Lê belê heta niha ew rêkeftin nehatiye bicihanîn.