Qedexeya çûnûhatinê îro li Rojavayê Kurdistanê destpê kir

PeyamaKurd – Li Rojavayê Kurdistanê, ji ber zêdebûna haletên pêketina bi vîrûsa Koronayê, qedexeya çûnûhatinê ji bo hefteyekê hat ragihandin û qedexe îro destpê kir.

Li gor biryara Rêveberiya Xweser, qedexeya giştî li Heseke, Qamişlo û Reqayê ye û li bajarên din yên Rojavayê Kurdistanê û herêmên Rêveberiya Xweser jî qedexeya sînordar ji saet 4ê êvarî, heta 6ê sibehê ye.

Li gor biryara qedexeyê:

- Tevahiya kombûn (Şahî, konên sersaxiyê, civîn, nimêjin li cihên îbadetê û tevahî kombûnên din) ji 3ê Nîsana 2021'an qedexe ne.

- Tevahiya xwaringeh, kafe, kafeterya û bazarên gelêrî têne girtin, karê li xwaringehê di demên derveyî qedexeyê de ku daxwazên derve bi cih tînin.

- Tevahî dibistan, zanîngeh û peymangeh tên girtin.

- Dergehên sînorî têne girtin, ev yek rewşên mirovî, nexweş, xwendekar û tevgera bazirganiyê di nav xwe de nagire.

- Ji ber zêdebûna pêketiyan li bajarên Qamişlo, Hesekê û Reqayê li van bajaran qedexeya derketina derve ya giştî ji sibeha roja Sêşemê 6ê Nîsana 2021'an ji 06:00an heta roja Duşemê 12ê Nîsana 2021an tê ferzkirin. Qedexeya giştî (Firne, sûkên zebzeyan, nexweşxane, dermanxane, dikanên bazirganiyê, derman, sotemenî, tîmên tenduristiyê, cotkar û ragihandin) di nav xwe de nagire.

- Bikaranîna maskan li tevahî cihên li tevahî welatiyan tê ferzkirin, kesên ku li xwe nekin, bi hezar lîreyên Sûrî tên cezakirin.