Qedexeya li Wanê 15 rojên din hat dirêjkirin

PeyamaKurd - Qedexeya xwepêşandan û çalakiyên cemawerî, li bajarê Wanê yê Bakurê Kurdistanê bo 15 rojan car din hat ‎dirêjkirin.‎

Walîtiya Wanê bi daxuyaniyeke nivîskî ragihand, ji 8ê Sibata 2020an heta 22ê Sibatê bo  15 rojan li sînorê Wanê û bajarokên wê, ji xeynî çalakiyên fermî, hemû xwepêşandan, meş, grev, ‎vedana konan û çalakiyên din hatin qedexekirin.‎

Sedema qedexeyê jî wekî parastina saziyên komarê, yekparçeyiya xelk û axê, ‎parastina maf û azadiya welatiyan, rêgirtina li tawanan û wergirtina tedbîrên ‎demkî hat nîşandan.

Hêjayî bibîrxistinê ye, ji ‎‎21ê Mijdara 2016an ve li bajarê Wanê hemû çalakiyên cemawerî bi biryarên parêzgariyê têne qedexekirin ku bi taybet piştî hewla kotedaya FETOyê û ragihandina rewşa awarte ev yek hatibû destpêkirin.