Qiralê Urdunê serkeftina Partiya Demokrat a Kurdistanê (PDK) li Serok Mesûd Barzanî pîroz kir

PeyamaKurd – Qiralê Urdunê Abdullahê Duyem ji bo serkeftina Partiya Demokrat a Kurdistanê (PDK) di hilbijartinên parlementoya Iraqê de ku zêdetirî milyonek deng bi dest xist, pîrozbahî li Serok Mesûd Barzanî kir.

Di daxuyaniyekê de ji Ofîsa Barzanî diyar kir ku Serok Barzanî roja Yekşemê 16ê Mijdara 2025an li Pîrmamê pêşwaziya Ziyad Batarisa, Balyozê Giştî yê nû yê Keyaniya Urdunê kir.

Balyozê Giştî yê Urdunê di hevdîtinê de silav û rêzgirtina taybet a Qiral Abdullah ji Serok Barzanî re ragihand û tekez kir ku ferman û şîretên Qiralê Urdunê her tim xurtkirin û berfirehkirina têkilî û dostaniyê bi Herêma Kurdistanê re bûn.

Ziyad Batarisa ji bo serkeftina PDKê pîrozbahî li Serok Barzanî kir û diyar kir ku ev nîşanek eşkere ya cihê PDKê di nav gelê Kurdistanê de û pêşketin û geşbûna ku bi saya PDKê hatiye bidestxistin e.

Serok Barzanî spasiya Padîşah Abdullah û gelê Keyaniya Urdunê kir ji bo piştgiriya wan di demên dijwar de, û Padîşah Abdullah wekî bira û dostekî hêja bi nav kir.

Mesûd Barzanî herwiha girîngiya kûrkirina bêtir têkilî û dostaniya di navbera Herêma Kurdistanê û Keyaniya Urdunê de tekez kir.

Di hevdîtinê de pêvajoya siyasî ya piştî hilbijartinê li Iraqê û rewşa siyasî ya navxweyî ya Herêma Kurdistanê jî hatin nîqaşkirin.