Rêveberên HDP û DBPê yên Diyarbekirê, hatin desteserkirin

PeyamaKurd- Di çalakiyên bi boneya 24emîn salvegera derxistina Rêberê PKKê Abdullah Ocalan a ji Sûriyeyê de li Diyarbekirê hat xwestin ku meşek bê lidarxistin lê ji ber destûr nehat dayîn, alozî derketin û bi dehan kes hatin desteserkirin.

Li ser çalakiya navborî ku ji bilî Diyarbekirê, li bajarên din ên wekî  Wan û Cizîrê jî hatin kirin de alozî derketin.

Hat zanîn ku rêveberên HDP û DBPê û pêkhateyên wê ku xwestin bimeşin, rastî astengiya hêzên ewlehiyê hatin. Ji ber ku hêzên ewlehiyê da zanîn ku ev meş bê destûr tê kirin, destwerdan çêbû û di encamê de 50 kes hatin binçavkirin.

Hat ragihandin ku di nav van kesên desteserkirî de Hevserokên HDPê yên Diyarbekirê Zeyad Ceylan û Gulîstan Atasoy û Hevserokê DBPê yê Diyarbekirê Xêredîn Altûn jî hene.

Her wiha Serokwekîla Koma HDPê Meral Daniş Beştaş jî li dijî helwesta hêzên ewlehiyê nerazîbûn nîşan da û amaje kir ku bi awayekî dijyasayî, zext li ser mirovan tên kirin.