Rojava | Pistî zêdebûna pêketiyên koronayê biryarên nû hatin dayîn

PeyamaKurd - Li Rojavayê Kurdistanê ku di nav 24 demjimêrên borî de 34 kesên din bi vîrûsa koronayê (Covid-19) ketine, hejmarek biryarên nû hatin ragihandin.

Hevserokê Desteya Tenduristiyê ya Rêveberiya Xweser amarên vîrûsa koronayê (Covid-19) yên 24 demjimêrên dawî yên li rojavayê Kurdistanê belav kir û ragihand, 34 kesên din bi vîrusa koronayê ketine 13 kes li Hesekê, 11 kes li Qamişloyê, 9 kes li Dêrikê û kesek jî li Girkê Legê ye.

Herwiha hat diyarkirin ku 8 kes baş bûne û di nav 24 demjimêran de jî ti kesî jiyana xwe ji dest nedaye.

Piştî zêdebûna haletên pêketina koronayê zêde bûn, Lijneya Krîzê ya Koronayê li Herêma Firatê civiya û hejmarek biryarên nû ji bo pêşîgirtina belavbûna vîrusa koronayê hatin ragihandin.

Biryarên Lijneya Krîzê ya li dijî Koronayê ya li Herêma Firatê wiha ne:

- Têketin û derketina ji Herêma Firatê hat qedexekirin. Ev biryar rewşên awarte, nexweşên giran, wesayîtên derman û petrolê, wesayîtên ku kelûpelên xwarin û vexwarinê vediguhezin û saziyê mirovî li xwe nagre.

- Kombûna li holên şahî û dawetan, kafe, qehwexane û parkan hat qedexekirin.

- Xwaringeh û restoran eger tedbîrên pêwîst werin pêkanîn, tenê dikarin xwarinan bigihînin  malan.

- Li mizgeftan îbadetên bi cemaetî û danîna şînê hat qedexekirin.

- Hevdîtinên li nexweşxane û girtîgehan hat rawestandin.

- Hemû çalakiyên perwerdeyê, li temamê saziyên perwerdeyê hatin paşxistin.

- Li saziyên Rêveberiya Xweser hejmara karmendan hat kêmkirin, lê saziyên ku divê rojane bixebitin, li derveyî vê biryarê ne.

Biryarên ku hatine dayîn, wê heta 28ê Tebaxa 2020an berdewam bin.