Serkirdeyekî DAISê ji aliyê Hêzên Hevpeymaniya Navdewletî hat desteserkirin

PeyamaKurd – Serkirdeyekî DAIŞê li bakurê Sûriyê ji aliyê Hêzên Hevpeymaniya Navdewletî ya li dijî DAIŞê hat desteserkirin.

Hevpeymaniya Navdewletî bi daxuyaniyekê diyar kir, Hêzên Hevpeymaniya Navdewletî îro 16ê Hezîranê serkirdeyekî diyar ê DAIŞê desteser kir û got, ew yek ji serkirdeyên bilind ên DAIŞê bû û bombe çêdikirin.

Herwiha Hevpeymaniya Navdewletî eşkere kir, plana girtina wî serkirdeyê DAIŞê bi hûrî hat danîn û operasyon jî serkeftî bi dawî bû, bêyî ku tu ziyan bigihe xelkê sivîl û hêzên Hevpeymanan û balafirên wê.

Di berdewamiya daxuyaniyê de hat destnîşankirin: “Hevpeymaniya Navdewletî wê bi hevkarên xwe Hêzên Sûriyeya Demokratîk û hêzên ewlekariyê yên Iraqê û Pêşmerge re berdewam be, ji bo dûvçûn û lêgerîna li çekdarên DAIŞê û garentiya jinabirina yekcarî ya DAIŞê.”

Hevpeymaniya Navdewletî navê wî serkirdeyê DAIŞê û cihê operasyon lê pêk hatiye eşkere nekiriye.