SOHRê amarên pevçûnên li derdora Bendava Tisrînê eskere kir

PeyamaKurd – Li gorî Çavdêriya Mafên Mirovan a Sûriyeyê (SOHR) ji 12ê Kanûna 2024an heta niha 603 kes di pevçûnên li derdora Bendava Tişrîn û Pira Karakozakê de hatine kuştin.
Li gorî amarên dawî, di şer û pevçûnan de 458 endamên Artêşa Niştimanî ya Sûriyê û 90 şervanên Hêzên Sûriyeya Demokratîk (HSD) jiyana xwe ji dest dane. Di pevçûnan de 55 sivîl jî jiyana xwe ji dest dan ku 7 ji wan jin û 4 jî zarok in.
Li aliyê din Navenda Ragihandinê ya HSDê ragihand ku şervanên wan di 8ê Sibatê de êrîşî baregeheke artêşa Tirk a li rojhilatê Minbicê kirine.
Herwiha li gorî agahiyên ji çavkaniyên herêmî hatin girtin, endamên Artêşa Neteweyî ya Sûriyeyê nanpêja dikandarekî Minbicê topbaran kirin.
Xwediyê firinê bertek nîşanî bombekirina firna xwe da û got: “Bi zanebûn hatiye bombekirin. Bomberdûman ji aliyê bakur ve hat… Binêrin, ma maqûl e ku meriv van kiryaran bike? Wê kî ji ber van sûcan hesab bide? Heta dijminê me jî tiştekî wiha nekir.”