Stoltenberg: Ji bo serkeftina Ukraynayê bingehên pêwîst hatin avêtin

PeyamaKurd – Sekreterê Giştî yê NATOyê Stoltenberg di 75emîn Lûtkeya NATOyê ya ku li paytextê Amerîkayê hat lidarxistin da civîneke çapemeniyê li dar xist.

Stoltenberg diyar kir ku Ukraynayê ji ber derengiya desteka leşkerî zivistan û bihareke dijwar derbas kir û got, "Lêbelê em ê nehêlin ev yek careke din pêk were. Em di vê lûtkeyê de kevirê bingehîn dizivirînin û ji bo Ukrayna bi ser bikeve bingehên pêwîst datînin."

Jens Stoltenberg dubare kir ku hevalbendên NATO ji Ukraynayê re di warê alîkarîya leşkerî, perwerdehî û piştgirîya aborî de, di nav de pergalên parastina hewayî yên krîtîk, soz dane Ukraynayê û got, "Îro em peyameke xurt a yekîtiyê ji Moskowê re dişînin ku tundî û tehdîd wê bi ser nekeve û Ukrayna dikare ji niha û pê de jî xwe bispêre NATOyê."

Stoltenberg bal kişand ku di hevdîtinên NATOyê de bi hevkarên xwe yên li Okyanûsa Pasîfîkê ra hevdîtin hatin kirin û wiha got: "Em li hev dikin ku Çîn bêyî ku bandorê li berjewendî û îtîbara Pekînê bike nikare mezintirîn pevçûna leşkerî ya li Ewropayê bidomîne."

Stoltenberg bal kişand ku ji bilî Çînê, Îran û Koreya Bakur jî li Ukraynayê bi balafirên bêmirov, cebilxane û yên din piştgiriyê didin Rûsyayê û da zanîn, "Ev bi zelalî nîşan dide ku tiştên li Ewropayê diqewimin ji bo Asyayê girîng in û tiştên ku li Asyayê diqewimin ji bo Ewropayê girîng in. Ji ber vê yekê divê em bi hev re bisekinin ku ewlehî û berjewendiyan li cîhanek xeternaktir parve bikin û nirxên xwe yên hevpar biparêzin."

Di daxuyaniya nivîskî ya piştî Civîna Konseya NATO-Ukraynayê ya ku li ser asta serokên dewlet û hikûmetan beriya civîna çapemeniyê hat kirin de, piştgiriya hevalbendên NATOyê ya ji Ukraynayê re hat kirin û hat destnîşankirin ku ji şerê li Ukraynayê bi tevahî Rûsya berpirsyar e.

Di daxuyaniyê de hat gotin, "Ukraynayeke bi hêz, serbixwe û demokratîk a di nava sînorên wê yên navneteweyî de tên naskirin, ji bo îstiqrar û ewlekariya herêma Euro-Atlantîkê xwedî girîngiyeke jiyanî ye. Têkoşîna Ûkraynayê ya ji bo serxwebûn, serwerî û yekparebûna axê rasterast tevkariya ewlekariya Euro-Atlantîk dike."