Tirkiye li Sûriyê xaleke din a leskerî vala dike

PeyamaKurd – Hat ragihandin ku artêşa Tirkiyê amadekariya valakirina xala çavdêriyê ya li Şêr Mexar a çiyayê Şehşebo ku dikeve bakurê rojavayê parêzgeha Hemayê dike.

SOHRê daye xuyakirin, Tirkiye amadekariya valakirina  xala 11an a li gundê Şêr Mixarê yê çiyayê Şehşebo li bakurê rojavayê Hemayê dike ku di çarçoveya hevdîtinên Astanayê de û li gorî peymana  bi Rûsya û Îranê re hêzên xwe ji 14 Hezîrana 2018an ve li Şêr Mexar bi cih kiribûn.

Artêşa Tirk 19ê Cotmehê jî dest bi vekirin û veguhastina amûrên mezin ên cabilxaneyê ji xala 9an a li Morikê kiribû.

Tevî ku Tirkiye hinek xalên leşkerî vala dike jî SOHRê daye xuyakirin, herî dawî karwaneke din a leşkerî ya artêşa Tirkiyê ku ji 25 wesayîtên leşkerî û lojîstîk pêk tê, di deriyê sînor Kefer Losîn re li bakurê Idlibê derbasî Sûriyê bûye.