Ukrayna: Em derbasî hicûmê dibin, heta Îlonê em wê herêmê rizgar dikin!

PeyamaKurd – Berpirsekî Ukraynî ragihand ku ew dê bajarê Hersonê yê niha ji aliyê Rûsyayê ve hatiye dagirkirin û wêrankirin, heta meha Îlonê paşde bistînin.

Şêwirmendê rêveberiya devera Herson a girêdayî Kîevê Sergiy Klan, ji televizyona Ukraynayê re daye xuyakirin ku ew dê teqez heta meha Îlonê Hersonê azad bikin û wê hemû planên dagirkeriyê werin pûçkirin.

Klan diyar kiriye ku di qada şer de, rewş veguheriye û di demên dawî de, piraniya operasyonên leşkerî yên artêşa Ukraynayê serkeftî bûne.

Herwiha da zanîn ku ew êdî bi temamî derbasî hicûmê dibin û got, artêşa Ukrayna bi alîkariya çekên menzîldirêj ên ji wan re hatine, kêm be jî niha li başûrê Hersonê pêşveçûn bi dest xistiye.