Bi dronan îro 3 êrisî li baregeha hêzên hevpeymaniyê ya li Hewlêrê hatin kirin

Peyamakurd : Dijîterora Kurdistanê ragihand ku di du demên cuda de bi 3 dronan êrişî baregeha leşkerî ya Hêzên Hevpeymaniyê Navdewletî ya li Hewlêrê hatiye kirin.

Dijîterora Kurdistanê derbarê êrişê de li ser rûpela xwe ya fermî daxuyaniyek belav kir û got:

“Îro danê sibehê du dronên bombebarkirî êrişî baregeha leşkerî ya hevpeymaniya navdewletî ya li dijî DAIŞê ya li Balafirgeha Navdewletî ya Hewlêrê kirin û ew li esman hatin teqandin.”

Herwiha Dijîterora Kurdistanê da zanîn, “Di êrîşeke din a li ser heman cihî de droneke neteqiyayî ket xwarê.”

Li aliyê din li gorî malpera fermî ya Balafirgeha Hewlêrê, geşta ku dê ji Qahîreyê bihata Hewlêrê hatiye paşxististin û geşta ji Dohayê jî hatiye betalkirin. 

Di daxuyaniya Rêveberiya Balafirgeha Navdewletî ya Hewlêrê de hat ragihandin ku niha geştên balafiran vegeriyane rewşa asayî û geştên ku hatibûn betalkirin dê dîsa dest pê bikin.