Erdogan: Ez Hamasê wek rêxistineke terorîst nabînim

PeyamaKurd – Serokomarê Tirkiyeyê Recep Tayyîp Erdogan der barê Hamasê da wiha got: "Min qet ji Hamasê re negot rêxistina terorê. Hamas komeke berxwedêr e ku ji bo parastina axa xwe hewl dide."

Erdoganê ku ji bo 79emîn Lijneya Giştî ya Neteweyên Yekbûyî (NY) li New Yorkê bû, ji kanala NBC Newsê ya Amerîkayê bi Keîr Simmons ra hevpeyvînek kir.

Erdogan li ser pirsa têkildarî têkiliyên Tirkiye û Hamasê wiha bersivand:

"Em li dijî terorîstan in. Lê ez yek ji wan serkirdeyên ku Hamasê baş nas dikim. Min tu carî ji Hamasê re negot rêxistineke terorîst. Niha jî ez Hamasê wek rêxistineke terorîst nabînim. Ji ber ku Hamas komeke berxwedanê ye ku hewl dide xwe biparêze. Ji ber vê yekê, ez çawa dikarim komeke wiha ya berxwedanê wekî rêxistinek terorîst binav bikim?"

Komkujiya 7ê Cotmehê

Erdogan di bersiva pirsa 7ê Cotmehê de çi qewimî, Erdogan got ku divê êşa ku gelê Filistînê beriya vê pêvajoyê kişandiye neyê jibîrkirin û wiha dewam kir.

"Ji sala 1947an heta îro Filistîn bi wendakirina axa xwe hat roja îro. Dema ku em li pişt perdeyê lêkolîn dikin, mixabin divê em sedemên ku van şert û mercên 7ê Cotmehê amade kirine baş bizanibin. Pêdivî ye ku meriv wan baş fêm bike û dema em lêkolîn dikin ka çend Filistînî şehîd bûne û çend Filistînî li pişt perdeyê hatine kuştin, rewş digihîje astên pir cûda."

'Amerîka endamtiya Ukraynayê li NATOyê naxwaze'

Erdogan li ser pirsa ku Enqere çawa li endametiya Ukraynayê ya NATOyê di beşa Ukraynayê de dinêre, diyar kir ku wê di vê mijarê de li gavên hemû welatên NATOyê binêrin.

Erdogan got, "Amerîka di serî de naxwaze Ukrayna bibe endamê NATOyê. Gelek welatên NATOyê di serî de naxwazin Ukrayna bibe endamê NATOyê. Divê em bi dîtina van rastiyan biryara xwe bidin."