Erdogan, Sezgîn Tanrikulu wek terorîst îlan kir...

PeyamaKurd – Serokomarê Tirkiyê Recep Tayyip Erdogan, îro 14ê Îlonê di axaftina xwe ya merasîma tayînkirina qeymeqaman de, cardin gef li parlementerê CHPê yê Kurd ê Diyarbekirê Sezgîn Tanrikulu xwar.

Erdogan ku hefteya borî jî xwestibû Tanrikulu bê cezakirin, di axaftina xwe ya îro de jî got: "Parlamenterê qaşo, lê bixwe miswedeya terorîst e, çawa heqaretan li Mehmetcîkê min dike. Berpirsiyariya me ye ku em wek dewlet û darazê dersa wî bidinê.”

Sezgîn Tanrikulu çend roj berê di bernameyeke TV100ê de bi belgeyên Dadgeha Mafên Mirovan (DMME) yên Tirkiye hatibû darizandin û cezakirin, rexne li kiryarên berê yên artêşa Tirkiyê girtibûn.

Tanrikulu bal kişandibû ser avêtina 15 welatiyên Kurd ji helîkopterê di salên 90î de û  gotibû: “Doza avêtina wan 15 gundiyan ji helîkopterê bi biryara Dadgeha Mafên Mirovan a Ewropayê bi encam bûye û Hêzên Çekdar ên Tirk gundê wan jî şewitandiye û bombebaran kiriye."

Piştî van gotinan kampanyayeke lînçkirinê li dijî Tanrikulu hatiye destpêkirin û herwiha doz lê hatin vekirin. Sezgîn Tanrikulu jî bi belgeyên DMMEyê û delîlên doza navborî li ser medya civakî daxuyanî da.

Tanrikulu got, “Heqîqetên berê, bi pozîsyonên niha yên siyasî nayên veguhertin û guhertin. Zihniyeta ku niha hewl dide min lînç bike, wê piştî deh salan yên qala hebûna komkujiya Roboskê bikin jî lînç bike. Lê belê heqîqet bi lînçkirina we ji holê ranabin.”