Helmeteke berfireh ji bo paqijkirina taxên Hewlêrê ji pasmahiyên lehiyê tê rêvebirin

PeyamaKurd – Wezareta Bajarvaniyê bi daxuyaniyekê diyar kir; bi fermana Wezîrê Bajarvanî û Geştûguzariyê û bi serperiştiya Serokê Şaredariya Hewlêrê, hemû tîmên şaredariyê û rêveberiyên xizmetguzarî û jîngehpariyê, helmeteke berfireh ji bo paqijkirina taxên Hewlêrê ji paşmahiyên lehiyê birêve birin.

Wezareta Bajarvaniyê da zanîn; ji bo ku proseya paqijkirinê bi awayekî bilez birêve biçe, 100 amûr têne bikaranîn û hemû cihên ku hatibûn diyarkirin, hatin paqijkirin.

Serokwezîrê Herêma Kurdistanê Mesrûr Barzanî, pêr roja Yekşemê serdana bajarê Zêrîn û gundê Korê yên li derdora bajarê Hewlêrê kir û serdana ziyandîtiyên lehiyên li her du deveran kir.

Serokwezîr Mesrûr Barzanî di serdanê de eşkere kir; Hikûmeta Herêma Kurdistanê hemû hevkarî û alîkariyên pêwîst dê pêşkêşî ziyandîtiyên vê lehiyê bike û bi qasî şiyana xwe, wan qerebû bike.