HRWê ji ber darvekirina ciwanên Kurd Îranê riswa kir

PeyamaKurd - Rêxistina Şopandina Mafê Mirovan (HRW), bi daxuyaniyekê, ji ber darvekirina girtiyên Kurd Mihemed Qebadlo û Ferhad Selîmî rejîma Îranê şermezar kir. Rêxistinê piştrast kir ku kesên din yên ku bi tawanên nezelal û darizandinên nedadwerî cezayê darvekirinê xwarine û li ber darvekirinê ne hene,

Di daxuyaniya HRWê de hatiye destnîşankirin ku rayedarên rejîma Îranê bi lezeke metirsîdar û bi tûndî hukmên darvekirinê dane gellek kesan û hate ragihandin ku 11 kesên din jî li Îranê di bin metirsiya darvekirinê de ne.

HRWê teqez kir ku ev 11 kes, bi sedema tawanên nezelal ên wekî “yekdengî” û “belavkirina gendelîyê li ser rûyê erdê” di bin metirsîya darvekirinê de ne û divê welatên din zextê li rejîma Îranê bikin da ku cezayê darvekirinê yê li ser van tawanbarkirinên nediyar bi dawî bike.