Pêsniyar û rênimayiyên Serokwezîr ji bo berpirsên îdarî yên li Hewlêrê

PeyamaKurd – Serokwezîrê Herêma Kurdistanê Mesrûr Barzanî li gel parêzgarê Hewlêrê û berpirsên îdarî yên li parêzgehê civiya û çend pêşniyar û rênimayiyên xwe pêşkêşî wan kir û amaje bi wê yekê jî kir ku Hewlêr deriyê Kurdistanê ye û xwedî statuya xwe ya taybet e.

Di hevdîtinê de Mesrûr Barzanî got: “Pîvana herî baş ji bo me razîbûna welatiyan e û her ku ji xizmetguzariyan razî bin, em serkeftîtir dibin.”

Wî her wiha got: “Eger hemwelatî razî nebin ji tiştên ku em pêşkêşî wan dikin, em çi bikin û çi bibêjin jî  ew ê bi ti awayî alîkariya me nekin.”

Wî berdewam kir: “Eger em bikarin hemû çavkaniyên berdest ji bo berjewendiya xelkê bi kar bînin, ev yek pir baş e, ji ber ku eger em nikarin tiştên ku di destê me de hene ji bo berjewendiya welatiyan bi kar bînin, ev tê wê wateyê ku pirsgirêk heye û divê em çareser bikin.”

Mesrûr Barzanî tekezî bi wê yekê kir ku “Eger çavkaniyên me yên têra xwe tune bin û welatî vê yekê nizanibin, ev pirsgirêk e û bi kêmanî divê ji wan re were eşkerekirin.”

Wî got: “Em di gelek aloziyan re derbas bûn, paşê bûdceya vîrusa koronayê hat kêmkirin û rewşa aborî ya herêmê bi giştî xirab bû.”

Wî zêde kir: “Heke we tiştek ji bo mirovan tune be, tenê hûn dikarin bi rûyekî xweş bi wan re biaxivin û wan qanih bikin û ji wan re rave bikin, ev ji her tiştî mezintir e.”

Serokwezîr amaje bi wê yekê jî kir ku eger ew  li hember welatiyan bêedaletiyê bikin, dê kîn û nefret çêbibe û dê li dijî vê helwêstê nîşan bidin.

Dûvre wiha dewam kir: “Ez nabêjim ku her kes bi heman awayî bertek nîşan bide, wek mînak 2 xwendekar li dibistanê dixwînin ku yek jê jîr û yê din tembel e. Mamoste nikare heman notê bide herdu xwendekaran.”

Wî her weha got: “Hin kes hene ku jîrtir in û karekî baştir dikin û dikarin berhemên baştir bi dest bixin.  Ez nikarim bibêjim ku ew ê hemî di heman astê de bin.”

Got: “Xwedê tiliyên destên we wek hev neafirandiye ku em bibêjin li vî welatî dê hemû mirov wek hev bin.”

Serokwezîr di axaftina xwe ya ji bo berpirsên îdarî yên li Parêzgeha Hewlêrê de got: “Çima em nikarin xizmeta herî baş ji welatiyan û ji xwe re bikin?”

Wî meraq kir: “Yên ku dewlemend in û dixwazin ji jiyanê kêfxweş bibin û xwediyê xanî û otomobîleke bedew in, gelo ew dikarin bi tenê li welatekî feqîr weha bikin?”

Wî her weha got: “Mirov li çavbirçîtiyê dinêre û li ser wê diaxive, ev yek nayê kirin, lê heke hemî jiyaneke xweş bijîn, ew dikare jê kêfê bike û ev mînakeke hêsan e.”

Mesrûr Barzanî behsa destpêkirina erka xwe ya serokwezîriyê di avakirina 9emîn hikûmeta Kurdistanê de kir û got: “Dema ez hatim, wê demê gelek kesan hizir dikir ku ez ê gelek zalim bibim, xelkê bigirim û derxim.”

Wî zêde kir: “Lê ne wisa bû, ji ber ku ez nafikirim ku hûn bi cezakirina mirovan sûcdar bikin, lê ez dixwazim ku mirov xwe qenc bikin û şens bo wan bê dayîn.”

Dûvre weha berdewam kir: “Ez bi gelek tiştan dizanim, lê ez bawer im ku şansê duwem bidin mirovan an jî bidin partiyekê, lê eger xeletî gelek caran werin dûbarekirin, ev hemû ye, lewra eger xeletî bên paşguh kirin, ev nayê wê wateyê ku ew xeletî dê demek dirêj werin paşguhkirin.”

“Êdî xerabî nayê erêkirin,” wî got. “Heger ceza hebe, tu kes giliyê sedema wê nake, ji ber vê yekê ez ji we daxwaz dikim ku xwe di ser kesekî din re nebînin û xizmeta gel bikin.”

Wî her weha derbirî: “Eger hûn xizmetê nekin dê yekî din were, ji ber ku divê ev emanet wek xwe bê cîbicîkirin û eger yek ji me nexwaze vî emanetê bi rêk û pêk bîne, Xwedê wê ji me bistîne û bide kesekî din.  Ji ber vê yekê hûn nikarin ji van derfetan ji bo xwe bi kar bînin.”