Parêzgarê Diyarbekirê: Mebesta me jiyandin û pêsxistina Kurdî ye

PeyamaKurd – Parêzgar û wekîlê şaredarê bajarê Diyarbekir ê bakurê Kurdistanê ku wekî qeyûm hatiye erkdarkirin Munîr Karaloglu, di bernameya bi navê ‘Baskên Rojhilatê’ protokola weşana hevpar a berhemên klasîkên Kurdî îmze kir.

Karaloglu di bernameya îmzekirina protokola ligel Wezareta Çand û Turîzmê ya Tirkiyê de ku her sê klasîkên Kurdî yên ‘Dîwana Feqiyê Teyran, Dîwana Melayê Cizîrî û Mem û Zîna Ehmedê Xanî’ hatin pêşandan de, axaftinek kir.

Di bernameya ku li Navenda Kongre û Çandê ya Sezaî Karakoç hat sazkirin de, Wezîrê Çand û Turîzmê Nurî Ersoy, pêşengeha wêneyan a li ser mijara berhemên Melayê Cizîrî, Feqiyê Teyran û Ehmedê Xanî vekir û piştre jî protokola çapkirina berhemên klasîkên Kurdî hat îmzekirin.

Parêzgarê Diyarbekirê Munîr Karaloglu li ser mebesta wan a çapkirina berhemên klasîkên kurdî wiha axivî:

“Mebesta me jiyandin û pêşxistina kurdî ye. Em dixwazin berhemên klasîkên kurdî bigihînin ciwanan û ji bo wan kitêban bixin pirtûkxaneyên xwe hêsankariyê bo wan bikin. Yanî em dixwazin bikaribin bi hêsan xwe bigihînin wan berhemên şexsiyetên mezin ku bi şaristaniya me hatine meyandin û wek mîrate ji me re mane. Înşelah wê bi van çapan re berhemên klasîkên kurdî bikevin pirtûkxaneyên hîn zêdetir kesan.”