Serokê Parlamentoya Urdinê bi serdaneke fermî gihîst Kurdistanê

PeyamaKurd - Serokê Parlamentoya Urdinê Ebdulmunim El-Odat bi serokatiya şandeke fermî, îro Yekşemê gihîşt Herêma Kurdistanê. El Odat li Balafirgeha Navdewletî ya Hewlêrê ji aliyê Seroka Parlamentoya Kurdistanê Rêwaz Fayiq ve hat pêşwazî kirin.

Serokê Parlamentoya Urdinê Ebdulmunim El-Odat destpêkê serdana Parlamentoya Kurdistanê dike û ligel Desteya Serokatiyê û serokên firaksiyonan dicive.

Hat zanîn ku wê Serokê Parlamentoya Urdinê îro serdana Serokê Hikûmeta Herêma Kurdistanê bike, piştre bi Serokê Herêma Kurdistanê re dicive. Herwiha wê hevdîtina wî bi Serok Barzanî re jî hebe.

Biryar e, Serokê Parlamentoya Urdinê Ebdulmunim El-Odat di civîneke rojnamevî de, armanca serdana xwe ji Herêma Kurdistanê re eşkere bike.

Urdin yek ji welatên ku pêwendiyên wê yên dîrokî bi serkirdeyên Kurd û bi taybet Serok Barzanî re hene ye û kusolxaneya wê li Herêma Kurdistanê heye ku dixwaze pêwendiyên xwe bi pêş bixe û hevahengiya di navbera her du aliyan de berfirehtir bike.

Serokê Parlamentoya Urdinê Ebdulmunim El-Odat doh 4ê Îlonê bi serdanekê gihîştibû Bexdayê û bi berpirsên pilebilind ên Iraqê re jî civiyabû.